Guatemala - Belize

Hola!

Lima / Peru - Costa Rica - Guatemala City - Flores / Guatemala.

Isch auso e mega Reis gsi bis i de aendlech a mim Ziel bi acho.

Chum usem Flueger usgstiege ha i de scho grad mau es Problem gha. Z Guatemala City am Flughafe gits genau ei Bankomat...u dae isch leider grad kaputt gsi. Tja...leider het Gutatemala nid di glichi Waehrig wie Peru u so bi i auso grad mau ohni Gaeud dagstande. S heigi Outomate ir Stadt...aber mit mim oeppe mittlerwile 20 Kilo schwaere Rucksack, ke Ahnig wie lang umedstschumple, isch nid grad unbedingt das gsi wo i mir ha vorgstellt. Aber ke Angscht...bi de dank fruendleche Polizischte, Guesthousebsitzer u Taxifahrer glich no zu Gaeud cho...si si auso zimli hilfsbereit d Luet vo Guatemala.

Bi de a daem Abe grad diraekt ine Nachtbus ghocket u uf Flores gfahre. Dert ha i de uf mi Bsuech us dr Heimat gwartet...

Mit chli Verspaetig isch de ds Gabi o in Flores acho...bi se de am Flughafe ga abhole u ha mi mega gfroeit uf di zwe Wuche wo mir zaeme d Gaegend choei unsicher mache!

Mhhhhhhhhhhhh, ha de sogar es paar Gschaenkli vo daheim uebercho...d Gummitierli hei aebe leider nuemm bis zum Foto ueberlaebt;-))


Scho grad am naechschte Tag hei mir de e Usflug uf Tikal gmacht. Mir si de mit uesem Guide oeppe vier Stung chruez u quer duere Dschungel gloffe u hei ei "Steihuufe" ume anger agluegt;-)

Isch auso spannender gsi aus es hie itz viellech usgseht. Loufsch duere Dschungel u ploetzlech steit wie usem Nuet e riise Mayataempu vor dr. Idrueklech...u we me no schwindelfrei isch, wird me nachem ufekraxle no mit amne mega Usblick uebere ganz Urwald belohnt.

Churz bevor mir de zruegg uf Flores hei woeue hets de no afa raegne...ungloublech...miner erschte Raegetropfe sit....................are Ewigkeit! D Bruellaffe heis de gloub o nid so luschtig gfunde...dir haette das auso soeue ghoere, es mega Gebruell...machenechs de auso mau nache we i ume daheim bi;-)

O we Guatemala e iladende Idruck macht si mir de gli witer uf Belize greist. U dae Graenzuebertitt isch ja dr Hammer gsi...

...das ha i ja no nie so erlaebt...u i bi ja itz mittlerwile scho es paar mau ueberne Graenze spaziert. Mi louft viellech hundert Meter u chunnt ine komplet anderi Waelt. "Go slow" isch z Motto in Belize. Aus geit grad chli gmuetlecher zue u haer u jedae Typ het e fraeche, coole Spruch druffe. D Luet gseh o totau anders us...u es wuerd eim nid verwungere we eim ploetzlech dr "Bob Marley" wuerd uebere Waeg loufe. U d Musig...bi grad chli i mini Jugend versetzt worde...bi ja fruecher eis e mega Reagge - Fan gsi...u i saege nech...nach derae Zit in Belize nime i de ume eis miner aute CD s fuere;-)

Uesi erschti Station in Belize isch de San Ignacio gsi. E chlini Stadt grad nach dr Graenze.

Mit em Kanu ine Hoehli gondle u zum ne Wasserfall mit Naturalpool loufe isch de dert ufem Programm gstande. Eigentlech e Tagestrip wo bis oeppe am fuefi haett soeue duure...mir si auso afa knapp nach Mitternacht zruegg im Hostel gsi.

Barton Creek Cave...

Naturwhirlpool...
...u so ischs de am Abe witer gange...

Mit dr "Rosita" isch uesi Reis de witer gange. Bus fahre in Belize ghoert sicher o ender zum ne Aventura. Nid unbedingt bequem, Sitze wod i derae Hitz fasch dranne chlaebsch wie ne Chaetschgummi u ganz sicher irgendwo e gwundrige Belizianer wo di ganzi Fahrt u Froeid het wed mit ihm laferisch.

Mit dr Rosita si mir de nach vier Stung in Belize City acho. Es isch nid unbedingt e Ort zum blibe u so si mir diraekt ines Boetli gstige u uf Caye Caulker witergfahre...

Ufe naechscht Blogitrag choeit dir nech auso freue...scho nume driluege wird sech lohne:-)

Auso, dir ghoeret ume vo mir...e liebe Gruess id Heimat

Hasta luego Caro

Huacachina / Peru...oder irgendwo zmittst ir Sahara;-)

Hola!

So ha i auso miner letschte Tage in Peru gnosse...es isch auso wuerklech in Peru...

Huacachina isch e chlini Oase zmittst ire riise Maengi vo Sandduenene ir Nechi vo Ica. Mi chunnt sech auso vor wie zmittst ir Sahara...oder so ( bi ja no gar nie dert gsi;-))

I ha mir de es naetts Hostel gsuecht...u ha de sogar es bezahlbars mit amne Pool gfunge. Isch absolut ruhig hie...es richtigs Paradies zum chli sii, laese, erhole u gniesse. Guet, ha mi de glich nid di ganzi Zit choenne still ha...;-)

Ufe de Sandduenene umekrabble, abegumpe, igrabe, dr Sunneufgang gniesse, u...natuerlech ufemne snowboardaehnleche Gfaehrt d Duene abebruuse! S isch auso mega luschtig gsi... zwar het me nid so schnaeu choenne fahre u id Kurve ineliege isch o nid so guet gange...ja weni ehrlech bi isch scho e normali Kurve gar nid so eifach gsi...aber, s het gfaegt...mi muess eifach "sandfescht" si...dae het me naemlech naer ueberall:-)

I ha di paar Taeg mega gnosse...s het de aber gli gheisse zruegg uf Lima fahre u uf Guatemala fluege...u vo dert gits de sicher o ume News...

Haebets guet...Hasta luego

Caro

Machu Picchu / Peru

Hola!

Z Cusco acho ha i mi de afa eis ad Hoechi muesse gwane...vo 0 uf 3499 Meter i guet are Stung ( i bi ja gfloge) steckt uese Koerper nid eifach so waeg. Schlafe, aus chli ruhig naeh u es Mate de Coca trinke isch de z Beschte gsi wo i ha choenne mache. Cusco isch auso e haerzigi chlini Stadt...


...mit viiiielne Laede. Es het eifach ei Lade am andere...es Paradies fuer Shoppingfreaks...Chappene in jedere Farb, gmusteret, raechts oder linggs glismet, vo Hand oder mit dr Maschine...eifach viel...so weit das Auge reicht... u nid nume vo de Chappene hets hie z Cusco gnue...i ha auso i mine ganze Ferie no nie so viu Turis uf eim Huufe gseh!

Ha de hie d Andrea vo Baern ( uebrigens eini vo de jassende u feschtende Baernerinne ) ud Anne vo Berlin troffe u mir hei ues churzerhand fuer nes Trekking zum Machu Picchu agmaeldet. Isch e alternativ Trek zum Inkatrail gsi. Ei Tag biken, zwe Taeg wandere u am vierte Tag isch me de no zum Machu Picchu ufegloffe. Toent doch guet, oder?

Mir heis de ine mega luschtigi Truppe preicht. 16 Luet vo fasch ueberall uf dr Waelt... England, Schwede, Duetschland, Oustralien, Schottland, Brasilien, Neuseeland ur Schwiz...

Dia 1 - biken...oder so;-)

Di Velo wo mir hei uebercho si auso nid unbedingt Gigathlontouglech gsi...aber si si gfahre! Mit denae Drahtesle hei mir de e vierstuendegi Tour gmacht. Drueehaub Stund abe u e knappi haub Stund ufe...denn hei mir de o z erscht mau gmerkt, dass me gar nid het choenne ine chlinere Gang schalte. Es het eim auso richtig dueregschuettlet uf denae Gfaehrt.

Isch de nid lang gange u dr erscht Pneu het ke Luft meh gha. Ja...u mi Platte isch de dr Zwoeit gsi. I bi de no ane Unfall haeregfahre. Dr eint Englaender hets auso boes verwuetscht...aer het de sogar sini Lippe muesse ga naeihe.

Si de no es paar Sache meh passiert a daem Tag...hie nume e churzi Zaemefassig...

no eis e Platte meh...oder sis aech zwe, drei, ...meh gsi;-)

e kaputtnegi Braems

u es het no afa schiffe...

...es isch de auso scho dunku gsi wo mir aendlech bir Unterkunft si acho.

Dia 2 - loufe

I saege nume eis...loufe, loufe, u no eis loufe,...u das fuer ganzi nuen Stung.

Es isch aber e mega schoene Tag gsi...( das finde i emu itz wo i so drueber nache daenke...haettet mi auso nid unbedingt denn muesse frage wo mir muehsam dr Inkatrail ufekraxlet si;-))


Zum Glueck hei mir no chli Ungerstuetzig vo troechnete Cocablaetter gha...we me di chaettschet schlaft eim auso nid nume ds ganze Muul i...nei, si gaebe eim auso ono chli Aextrapower...

Es isch e wunderschoeni Wanderig gsi...oder besser gseit e Teilstrecki drvo...d Ussicht nach em Ufstieg isch dr Hammer gsi...mi het auso fasch z Gfuehl mi sig allei uf derae Waelt!

Es Highlight meh isch de aber am Schluss no z Bade i de Hot Springs gsi! Dert ha i badet u nid gfoetelet;-)

Naer si mir aui ume erholt gsi...fit u zwaeg fuer nachem Znacht d Dorfdisco no unsicher z mache.

Mir hei auso e mega Party gha...u i ha itz auso es noeiis Lieblingsgetraenk...Pisco sour! U i weiss itz auso o, dass sogar d Schwede choei Salsa tanze;-)

...vor em Drink...

...u nach es paar Drinks;-)...irgendwie het dr Kolumbianer Omar dr Alkohol besser moege verlide aus mir...

Dia 3 - no eis loufe

Zimli verkateret isch di ganzi Truppe bim Zmorge ghocket...isch ja nid tragisch gsi...mir si ja am dritte Tag nume oeppe sibe Stung gloffe. Di letschte drei Stung si mir de de Bahnschine nache...isch zwar nuemm ueche, aber i uesem Zuestand d Holzlischte no z traeffe isch gar nid so eifach gsi. Mued u kaputt si mir de z Aguas calientes acho. I gloube a daem Abe het niemer me ads feschte daenkt...kes Wunder, uese Wecker het am naechschte Tag scho am vieri gluete!

Dia 4 - loufe zum Dritte

Dr Wecker het auso tatsaechlich am Morge am vieri tschaedderet. Am haubi fuefi isch de uese Ufstieg zum Machu Picchu losgange. S geit auso nume oeppe 1700 Staegetritte steil ufe bis me de z erscht mau e Blick uf ds Ziel cha waerfe. Es isch de aber idrueklech...u no fasch chli idrueklecher we me weiss, dass me sech das aus no saeuber erchrampfet het!

Mir si de sicher bis am Nami am zwoei dobe blibe...si umegloffe, ghoecklet, glaege u heis eifach gnosse das mir aendlech dert si gsi. Dr Abstieg isch de nuem so tragisch gsi...isch ja nume no abe gange.

Am haubi elfi si mir de, per Zug u Bus ume zruegg z Cusco acho.
E churzi chauti Duschi u e "Powernap"( auso eis vo mine noeii Lieblingswoerter )...u naer isch d Party ume witergange. Di ganzi Truppe het sech no eis troffe u bis am vieri am Morge witergfeschtet...i bi de auso haub tot ids Bett gheit...bi eifach nuemm di Juengschti;-)

Ha de Cusco ( zu mire eigete Sicherheit ) hinger mir glah. Witer isches per Bus uf Ica / Huancachina...

vo dert de meh im naechschte Blogitrag...i saege nume afa Sand, Sand u no einisch Sand!

machets guet...e liebe Gruess id Heimat

Caro