We are sailing, we are sailing,...from Panama to Columbia

Ueses Schiff u dr Kapitaen wo drzue ghoert...

13. - 18. Februar 2008

Mit amne mulmige Gfuehl ir Buuchgaegend ( dr Typ vom Hostel het geng so gheimnisvoll u komisch ta waege uesem Saeguschiff uf Kolumbien... ) ure Telefonnummere vo uesem Kapitaen im Sack si mir am Morge frueh am sibni in Panama City gstartet. Es sich scho es chliises Wunder gsi das mir dr richtig Bus gfunde hei u zum Glueck hei mir ne de ono grad verwuetsch. Wo mir de chli Zit hei gha d Luet rundume azluege hei mir de feschtgstellt, dass mir wit u breit di einzige Turis si gsi (das het sech de bis am Schluss o nie gaenderet ).
Nach guet are Stung hets de ploetzlech gheisse "Sabontas" - usstige u Bus waechsle. Ueser Ruckseck si scho uf dr Strass glaege wo mir usem Bus usgstiege si u d Connae het hurti e Vollsprint haeregleit - isch doch scho ume so e Typ verdaechtig nach a uesem Gepaeck gsi!
Vo Sabonitas uf Portobelo ischs de imne Holper-salsa-bus no oeppe eis e Stund gange. Mir hei nid so genau gwuesst wo usstige...aber mir hei afa glehrt...mir frage ues eifach aube quer duer d Luet duere.
U so si mir ufem Dorfplatz in Portobelo glandet...e Rucksack vor eine hinge...u au Luet hei ues chli komisch agluegt.
Mir hei de es Telefon gsuecht u uesem Kapitaen agluete...u dae het sogar abgnoh.
Lucho, ae vierzgjaehrige Typ us Chile het ues auso mit sim Saeguschiff ( uebrigens made in Switzerland ) i fuef Taeg nach Kolumbien soeue bringe. An Bord isch de no es Paerli us Kanada u e Belgier gsi. Isch auso nid so es grosses Schiff gsi. U mi weiss das ja eigentlech...es chliises Schiff u grossi Waelle beduete nie oeppis guets.
Mir si de no chli ga baedele, hei es Bierli trunke u gaege Abe isches de los gange - di erschti Etappe zu de San Blas Insle.
Quitschfidel si aui an Deck gsi, hei di grosse Waelle bestuunet u Froeid gha isches aendlech losgange. Isch oeppe e haub Stund gange u dr Kanadier isch geng bleicher u bleicher worde. Sini Fruendin isch de oscho gli ueber d Reeling useghanget, d Connae isch de di naechschti gsi wo z Zmittag de Fischli gfuetteret het u dr Belgier het de zum Schluss sech ono aus duere Chopf la gah...nume i ha Glueck gha. I ha gwartet u gwartet u gwartet...u passiert isch eifach nuet.
Am Morge frueh si mir de bi de San Blas Insle acho. Es git so gaege di druuehundert Stueck vo denae.

Chliini Iseli ( uf dr chliinschte het grad emau ei Palme Platz gha ), schneewisse Sand, tuerkisblaus Wasser u druff hets nume Palme u pro Inseli oeppe eis Huuesli vo de Kuna - Indianer. Riise Muschle liege eifach dasume u Seestaerne u Fischli cha me ono grad bewundere...eifach es chliises Paradies.
Das hei mir de zwe Taeg i volle Zueg choenne gniesse.

...ar Connae ihre noeii Fruend...(sorry Tinu;-))

Hie no es paar Bildli vo de Kuna - Indianer...

...das waer de uebrigens e Chindergarte...

Abwaechsligswiis hei mir Turis muesse choche. Mir hei oeppis typisch schwizerisches kochet...Roesti, Spiegelei u Kohlsalat;-) Het oepper vo oeich scho mau ghoert das Chohlslalat typisch schwizerisch isch;-))) D Kanadier, dr Belgier u dr Chilene hei emu Froeid gha...

U naer isches de losgange...54 Stung saegle ohni Land in Sicht. Dismau isch nid nume z seechrank si es Problem gsi sondern ono uese Kapitaen. Mir si gloub bim ne "Irre" ufem Schiff glandet. Mir doerfes auso fasch nid schribe...

Dr Lucho isch di meischti Zit bekifft u sturzbetrunke an Deck am Pennae gsi, waehrend daem ds Schiff mit em Outopilot gsaeglet isch. Mir hei auso gar nid doerfe dra daenke was passert waeri we dae vo Bord waer gheit. Guet, d Connae het nid wuerklech viu Zit zum ueberlege gha. Entweder isch si a Deck gsi u het i Horizont gschtieret oder si isch flach glaege u het d Dili vom Schiff bestuunet...u das di ganze 54 Stung.

Eis Highlight het o d Connae doerfe miterlaebe. Ueses Schiff isch vore Horde Delfine begleitet worde. Geng meh si cho z gumpe u am Schluss sis sicher gaege di fuefzg Stueck gsi...wahnsinn. Da hei aui z flaue Gfuehl im Buuch chli choenne vergaesse.

Gmacht hei mir uf dr Fahrt nach Kolumbien nid viu...nid emau oeppis guets aesse hei mir choenne...wie haette mir o soeue choche bi daem Waeuegang;-)

...but, don`t worry...we are still alive!

Mir si schlussaendlech guet in Kolumbien / Cartagena acho.

D Duschi, z Znacht uds "weiche" Bett hei mir gnosse wie vorhaer no nie im Laebe!

Emu d Connae...i has de lieber vorzoge chli "landchrank" z sii...aus um mi het gwaeuelet u gwaggelet u i ha mi bim Znacht sogar am Tisch muesse haebe. I bi mir auso vorcho aus haett i es mega Flash...eis oeppis angers;-)

Mir hei de z Cartagena no andei Gschichtli vo Saegutrips choenne ghoere...Es Italienerschiff isch grad zur gliche Zit ungerwaegs gsi wie ueses...denae ihre Kapitaen sig schiins es mega Arschloch gsi. Denae isch i di Waeue fasch z Schiff usenanggheit... u ds Schiff isch drzue de no voellig ueberlade gsi...Mir haettes auso no fasch chli schlimmer choenne preiche;-)

Das waers mau wieder gsi...mir si gspannt wis witer geit...mir hoffe dir o:-)

e liebe Gruess Connae u Caro

Panama

Hola!

Mir zwo hei di letschte paar Taeg in Costa Rica no ohni groesseri Zwueschefaeu choenne gniesse.

Mir si no eis ad Karibikkueschte uf Puerto Viejo gfahre...si chli ga Sii, ga baedele, hei de Surfertype zuegluegt u hei per Zuefau no es paar bekannti Gsichter us dr Heimat troffe...

Aus isch tip top gange ( das cha me ja suesch nid geng bhoupte ) nume mit uesne gmietete Velo hei mirs nid so im Griff gha...d Connae het chum choenne braemse u mir isch natuerlech d Choetti usegheit ( da mir aber im ne Land vo sehr hilfsbereite Manne si gsi, ha i de nid emau miner Finger muesse draeckig mache ).

Am Samschti dr 8.2.08 hetts de gheisse Adios Costa Rica u Hola Panama. D Connae hei si zwar ersch nach es paar Telefonat ( si het ja aebe ke Ireisestaempu meh im Ersatzpass ) us Costa Rica useglah aber suesch het aus tip top klappet.

Mir si de bis David gfahre ( gloub uese Fahrer isch im letschtae Laebe dr Schumi gsi ) u hei dert e Zwueschestopp gmacht. Im Purple House ( so zimli jedae Gaegestand i daem Huus isch violett gsi ) hei mir de imne Dorm gschlafe u si de scho ume frueh am Morge ungerwaegs gsi fuer uf Panama City.

Panama City...di meischte vo oeich kenne sicher dr Panamakanal u meh weiss me vo daem Land normalerwiis nid. Ues isches de so zimli glich gange...u so zimlech glich geits ues itz nach es paar Taeg Panama City. Mir wuesse itz auso ono, dass sis hie mit de Turis no nid so dusse hei. Ender unfruendlech u finde tuet me hie o nid wuerklech viu. Mir si de imne nid so megamaessige Hostal abgstiege u nach vier Taeg im Dorm schlafe hei mir de o gwuesst...mir si eifach nuemm zwaenzgi;-)

...so hei ueser Matraze vo unge usgseh...

Z Panama hei mir vorauem Zit bruucht fuer dr Waeg sueche u Schiff organisiere, hei aber de no zwe gmuetlechi Aebete mit amne Schwizer umne Oestricher verbracht...

...u mi gloubts fasch nid...mir zwo hei ( i z erschtmau im Laebe ) Wasserpfiffe groukt...

Hasta luego Connae u Caro

...e raabeschwarze Tag oder "wi zwo Schwizerchicas zure gratis Sightseeingtour imne Polizeiouto choemme"

Auso...mir foeh am Beschtae grad am Afang vo daem Tag a ( es wird de ender ae laenge Blogitrag...naemet nech aber hurti di Zit ne z laese...es raentiert sech;-))...Foeteli gaebs de ono eis drzue...

Es isch dr Dsischti, 5. Februar 08. Nach em Z moergele si mir uf di nueni eis ine Local - Bus ineghocket u si vo Fortuna uf San Ramon gfahre. Das heisst oeppe knapp drei Stund imne "liecht" ueberfuellte Bus hocke...ab und zue chli d Ouge zue tue, es paar Site imne Buech laese oder mit anderne Turis Reiseerlaebnis ustuusche. Mir hei de uf derae Busfahrt e "Amitube" lehre kenne...ufe erscht Blick no fruendlech u ufgschlosse ( oder aebe viellech scho fasch chli zu fruendlech, wie sechs spaeter het usegstellt ).
D Busfahrt isch tip top gange u mir si gaege Mittag ds San Ramon am Busbahnhof usgstiege.
U da fahts eigentlich z graechtem a.

Dr chlii Rucksack ( wo ja bekanntlech aui wichtige Sache vo de Traveller drin si ) am Ruegge, dr gross Rucksack wo me grad unge usem Bus usegschleift het no i de Haend...so si mir zmittst am Busbahnhof gstande. D Sache eis a Bode lege, dr Ruegge mau duerestrecke u luege wo dr Bus witer uf San Jose fahrt...u natuerlech de no hurti uf ds WC...( z ersch d Connae u i waer de eigentlech naer ono hurti gange ). Doch bekanntlech chunnt ja hie ab u zue aus anders aus me daenkt...
I bi bi de Ruckseck gstande, d Connae ufem WC, wo mi eine aquatscht u mi oeppis waegemne Bus fragt. I daem Momaent chunnt di "Amitube" ume drhaer u verzellt mir no oeppis waeg daem Bus nach San Jose (wo natuerlch grad am abfahre isch ), u dass si eigentlech Hunger heigi u dass i doch soeu daem Bus nacheseckle...und und und...Ablaenkigsmanoever vom Fiinschte. I ha de ume zu uesne Ruckseck gluegt...tip top...aus no guet.
Das het sech de aus fatale Irrtum usegschtellt. Dr chlii Rucksack vor Connae isch nid, wie i ha agnoh mit dr Connae ufem WC gsi, sondern scho irgendwo i derae huere Draecksstadt ( sorry fuere Usdruck...aber es sich eifach so ) bimne Tico.
Wo de d Connae vom WC zruegg chunnt, merke mir de ersch was da eigentlech passiert isch. Di Amitube ( wo zimli fliessend Spanisch redt ) het ploetzlech gar nuemm so fruendlech ta. Vo ues Haeufe isch grad gar nuemm gsi. Si isch de drvodampfet u het di chli gschockti Conae eifach la stah.

U itz...???

Aus furt ( Pass, Kreditcharte, Foeteler, Brille,...)...dr chlii wichtig Rucksack isch eifach niene meh ume gsi.
Irgendwie si mir de ine Farmacia cho u di hei de fuer ues ar Polizei agluete. U das haettet dir soeue gseh u miterlaebe...zwe Polizischte imne chliiiiiiiine Outo ( dr Kofferruum het me gar nuemm choenne uftue ) u mir zwo hinde inne mit de Ruckseck ( die wo no si da gsi ) ufem Schoss...so si mir de uf ds Polizeirevier gfahre. Mir hei dert uesi Ussag choenne ga mache.
UF SPANISCH...!!! I gwuesse Momaente cha me e froemdi Sprach auso ploetzlech viu besser aus me eigentlech gmeint het...u di schouspielerische Faehigkeite si o ploetzlech oscarriif;-)

Ufem Polizeirevier hei mir de vernoh, dass mir lang nid di einzige Turis sige wo das dueremachi. Es gaebi organisierti Truppene wo sech ihri Opfer ussuechi u naer heig me eigentlech fasch ke Chance meh.

D Connae het de no fasch es zwoeits Haerzchriesi uebercho...am Polizischt sis Natel het de ploetzlech waehrend dr Befragig gluete...dr Klingelton heisst gloub - di schreiende Frou wo grad ermordet wird... ( d Connae het aber gmeint das sigi sis Funkgraet wo grad eis zu eis ae Mord uebertraegi... )das nume no so naebebi verzellt.

Itz si mir ume in San Jose. D Connae bruucht e Ersatzpass u "muess" sech wohl oder uebel es paar Sache ga choufe.
Im Hotel hei mir de no e Oestricher lehre kenne...e bestohlene Oestricher! Genau am gliche Tag het me o ihn um nes paar Sache erliechteret...
Huet si mir uf d Schwizer Botschaft gange. Erwartet hei mir eigentlech es straeng bewachts Huus mit Polizischte wo mit Gwehr vor dr Tuer stoeh...Mir si fasch chli enttuescht gsi...
D Botschaft isch es chliises Buero im zaehte Stock vom ne Hochhuus...nume...

Mir hei dert itz dr Ersatzpass bstellt. D Connae het fuer das sogar no zum ne Fotograf muesse...Verbraecherfoeteli ga mache ( mi darf ja uf de Pass - Foeteli nuemm lache ).

Nume so zur Info...i eire Wuche waerde uf dr Amerikanische Botschaft oeppe 100 Ersatzpaess usgstellt...chli meh aus uf dr Schwizer Botschaft...s choemmi leider in Costa Rica no viu vor.
Isch gloub Zit, dass mit witerreise...Panama u Kolumbie si de hoffentlech chli di sicherere Laender;-)

Auso...we dir eis uf Costsa Rica wettet...mir waere de gaern d Aloufstell fuer jeglichi Infos...

Ke Angscht...ues geits guet u mir gniesse hie d Zit geng no i volle Zueg.
(Da mir ueser chliine Ruckseck itz aber nume no vorne traege, choemme mir ues eifach vor wie oeppe im sibete Monet schwanger...)

Hasta luego

Connae u Caro

Info zu mire Mailadraesse...

Auso...

Es isch itz so...oeppis stimmt mit mim Mail gar nuemm...ke Ahnig was genau...das ueberstigt miner Compikenntnis auso um Laengene.
I ha itz im Momaent ke einzigi Mailadraesse meh...drum nid haessig si we dir nie oeppis vo mir ghoeret.
Itz heissts eifach...z ersch schribet dir mir u naer cha i de o ume eis es paar Zile maile...

caroba75@hotmail.com

Es liebs Gruessli us San Jose ( u werum mir immer no i derae Stadt, wo naebebi gseit nid umbedingt so dr Hammer isch, umehange laeset dir de am Beschtae im naechschte Blogitrag).

Hasta luego

Connae u Caro

Info

Hola chicos y chicas...

Mir hoffe oeich aune geits guet u dir gniesset ds Pulverschneeli daheim o chli fuer ues mit!

I ha es chliners Problem mit mim Mail...geit eifach nie u i chume gar nuemm uf mi Adraesse...auso, i beantworte de d Mails scho ume eis...mit chli Geduld geit hie fasch aus;-)...Nid dass dir de no z Gfuehl heit i sig hie irgendwo verscholle...

Es geit nis auso guet...Im Momaent si mir no in Costa Rica aber scho gli geit de uesi Reis witer nach Panama. Dert wei mir de luege oeb mir mit amne Saeguboot uebere uf Kolumbien choemme. Huet gniesse mir aber z ersch mau es Bad i de Hot Springs bim Vulkan Arenal:-)

Mir haute oeich ufem Loufende...

Hasta luego Connae u Caro


...dass dir glich no oeppis Chliises zum Luege heit...Ds Bild heisst " mi Kampf mit em riiiiiiise Tier wo sech i mim Toilettetaeschli ignischtet het";-)...kaempft ha i uebrigens mit mim Kamm...