Chruez u quer duer Kolumbien

Hola!

Di Zit geit auso duere wie im Flug! Kolumbien isch dr Hammer. I gloub we mir no viu meh Zit haette, waere mir aeuae immer no hie. Vor Kueschte si mir de aus obe abe ad Graenze zu Ecuador greist...( uebrigens aus mit de verschiednigschte Busse u de verschiednigschte Erfahrige - siehe Blogeintrag zum Busfahre ). Vo derae Zit hei mir nech ono es paar Bildli u Gschichtli...

Di erschti Station isch Medellin gsi...fruecher mau e gfaehrleche Ort u huet eifach e grossi Stadt mit viune Outo, viune Luet u amne Kuenschtler wo ganz e eigeti Vorstellig vo sire ¨Troumfrou¨ het...Fernando Botero! Es het in Medellin auso e Platz vou mit Skulpture vo ihm...oeb Frou, Ma, Hund oder Ross...si gseh eifach aui gwaltig us!!!

D Connae het naer versuecht daem Frouebild e chli necher z cho...z Taeller Spaghetti het de aber bi witem nid glaengt drfuer;-)...

...oder?


...mir hei de haut naer no mit amne Stueck Turte nacheghulfe...ja, maengisch muess me sechs doch la guet ga, oder:-)

Nach Medellin si mir de witer uf Popayan u i witere saechs Stund im Bus z San Augustin acho...isch uebrigens di Strecki wo me vo Vorteil es Chotzseckli drbi het..nume so fuer die wo o mau dert haere wette...

San Augustin isch de e chline ruhige Ort...mit viiiiiilne Ross. Isch fasch uf dr Hand glaege, dass mir ds Aluege vo de Steiskulpture mit are Rosstour verbinde. Ei ganze Tag si mir de ufemne Goul ghocket. U die wo rite wuesse was das heisst. I ha auso nach denae saechs Stund es Fuedle gha wie es Baby...ne nei...nid fiin, sondern wund! Dismau het ds Ross wenigschtens gfouget u das gmacht wo me nim het gseit...Mir si auso galoppiert wie di Wilde, baeruf u baergab grite, si ines mega Gwitter cho u am Schluss hei mir usgseh wie ein Schwein. Isch aber e mega schoeni Tour gsi.

Leider gits vo ues u de Ross kener Foeteli...verchrampft ufem Ross hocke u foetele vertreit sech irgendwie nid no guet...

Uf derae Tour hei mir de d Brigitta lehre kenne.E haubi Schwizerin mit argentinischem Bluet. Mir hei de zwe mega luschtegi Taeg zaeme verbracht. Salud!!!

Uese letscht Abe hei mir de o gebuehrend gfiiret...z ersch e feini Pizza...

...u naer no e Turte ( scho ume )...mir hei de uebrigens nid di ganzi Turte saeuber ufgaesse...suesch waere mir itz sicher ae riiise Konkuraenz fuer d "Froue" vom Botero ;-))


Vo San Augustin si mir de im gliche Holperchotzbus zruegg uf Popayan gfahre...u grad direkt witer uf Pasto. Dert hei mir de no uesi letschti kolumbianischi Nacht verbracht.

Pasto - Ipiales - Quito isch de am naechschte Tag ufem Programm gstande...zum Glueck fuer nes Zitli di letschti laengi Busfahrt. Irgendeis weiss me eifach nuemm wie hocke i denae Busse.

Irgendwo,irgendwie,irgendeis imne Bus. Hie trinkt me ds Wasser auso us bolsitas...mit dr Zit hetme de auso dusse wie me unfallfrei us somne Seckli cha trinke...


Es het i derae Zit wo mir z Kolumbien si gsi ja es paar Schlagzile gaeh...hei si doch z Ecuador eine vor Farc umbracht. Mir hei vo au daem nid so viu mituebercho...d Graenze isch nume mau hurti gsperrt gsi. Wo mir de dert si gsi isch aus ume tip top gsi...u dert hei mir de aendlech o choenne luege wie dae umbracht Typ vor Farc de o het usgseh;-)

Ar Graenze zu Ecuador isches de chli muehsam gsi...mi muess eifach viel Ziit u Geduld ha. Wo mir de ar Reihe si gsi hei mir de zu auem zueche no es chliners Problem mit uesne Paess gha. Mir si ja uf nid ganz offiziellem Waeg uf Kolumbien cho...dr Staempu i uesem Pass hei mir o eifach so hurti naebebii uebercho...gloube nid ganz legal. Statt em Ireisestaempu uf Kolumbien hei mir de scho e Usreisestaempu im Pass gha...aber mit chli bloed stelle hets de de glich no klappet...

Itz hei mir auso Kolumbien hinger ues glah u witer geits in Ecuador. Mir fahre eis uf Quito, wette gaern uf d Galapagos u naer geit ja de d Connae scho gli ume gei...Si mir mau gspannt wies witergeit...

Hasta luego...bis gli!

Busfahren in Suedamerika...una aventura fuer sich...

Hola!

Ds Fortbewegigsmittel Nummer 1 si hie z Suedamerika Busse...chlini, grossi, ganz moderni oder o settigi wo scho fasch usenang gheie. D Connae u i hei itz emu afa chli Erfahrig mit de verschiedenschte Modell.
Eis isch aber garantiert bi jedaere Busfahrt...irgendoeppis passiert uf all Faell.
Hie nume e chlini Uswahl...

...es choennt ploetzlech si, dass e Bruegg fuer es paar Stung gesperrt isch ( so duure d Fahrte aube chli laenger...nid nume 16 Stung sondern ploetzlech 20 Stung! )

...ad Polizeikontrollene gwanet me sech relativ schnaell...s git o gnue vo denae. Z erscht mau luegt me aber scho komisch we aui Manne muesse usstiege u abtaschtet waerde. A de Turis si si nid wuerklech interessiert, " leider"...mir hei nid emau einisch doerfe uese Pass zeige;-)

...we me z erscht mau e Nachtbus nimmt, mache gloub di meischte e fatale Faehler ( mir uebrigens o ). Si hocke naehmlech genau so i Bus ine wie me hie normalerwiis grad agleit isch ( churzi Hose u es T - Shirt )...we me de nach es paar Stung usem Bus usechunnt, hett me auso fasch Erfrierigserschinige...di chuehle hie d Busse oeppe uf knapp 18 Grad abe...aber mi lehrt ja us aune Faehler...z naechscht mau si mir de usgrueschtet gsi ( sogar d Odlo - Ungerwoesch vor Connae isch in Gebruch gsi )...

...usstiege u loufe! Dr Bus het nuemm moege i daem Draeck...jae nu, ueser Schueh si sowieso scho draeckig gsi!

...das isch de fuer mi oeppe z Schlimmschte gsi wo het choenne passiere im ne Bus. Es het "liecht" gschuettlet di ganzi Fahrt u Kurve hets o nid grad weni gha. Isch auso nid lang gange wo de scho oepper het rueft - uns bolsa, una bolsa - so quasi, e Sack, e Sack u scho hets gwurget! Isch ja nume guet saechs Stung so gange. Ds aute Froueli wo het muesse chotze het nis aber de scho chli duuret.

( im Fau wed muesch chotze de bruuch e Sack )...das isch auso sogar vor im Bus agschriebe gsi.

...Van Helsing 3! Da d Busfahrte meischtens chli laenger duure, wird me hie mit amne usgwaehlte Filmprogramm beschtens ungerhalte. D Houptsach es chlepft u krachet u Bluet soett ono mit im Spiel si...es isch ja nume es Detail, dass ono chlini Chind im Bus mitfahre...

...oder gueti Salsamusig!!! Das gfallt nis de ume. Still isches i denae Busse hie nie u we me Glueck het, het dr Fahrer no e guete Musikgschmack!!!

Auso...daenket z naechscht mau dra...nid haessig si we dr Zug, Bus,...ei, zwo Minutene Verspaetig het...s choennt auso no ganz viu anders passiere;-)

Hasta luego...

u e Muntsch id Heimat!

Oschtere mau ganz anders - Galapagos

Hola!

Juhuu...es het klappet mit de Galapagos. Mir hei ja daheim nuet buechet gha u si eifach eis uf guet Glueck ines Reisebuero z Quito ga frage. Last minute...u das ueber Oschtere...aber mir hei Schwein gha. U de was fuer nes Schwein.

I ha fuer di vier Tag auso no fasch ine Benimm-dich-Kurs muesse;-)) mir hei doch tatsaechlech es Luxusschiff verwuetscht! U das isches auso...ueses Schiff u uesi Kabine!

Es waer fuer oeich auso fasch chli laengwilig we mir nech vo jedem Tier wuerde verzelle wo mir hei gseh ( si drum nid grad weni gsi )...mir verzelle oeich eifach wie mir i daem Jahr uesi Oschtere verbracht hei...

uese Oschtersunntig...

Punkt saechsi het ues z Telefon gweckt ( ja, mir hei auso sogar es Telefon ir Kabine ). Mir hei dae Tag mit em Sunneufgang woeue starte.

Nach em Zmoergele...es het auso jedae Morge es meeeega Buffet gaeh... hei mir de e Usflug uf d Insle Floreana gmacht. Es isch di juengschti vo aune Inslene. Schwarze Lavastei ueberfuellt mit spoeiende Iguanas, Seeloeie wo suennele u im Wasser spile, Krabbe wo umekrabble, flugunfaehigi Kormorane wo bade, u Schildchroet wo im Wasser umetuemple...um nume es paar Sache z verzelle wo me dert atrifft...

( I haett de suesch no es paar Bilder meh...fuer di wo Luscht hei;-))

Nach em Inselspaziergang hets de ufem Schiff es ecuadorianisches Zmittag gaeh.

D Mittagspouse hei mir ues de no mit amne Sangria an Deck versuesst.

Ploetzlech isch ufem Schiff aus hektisch u unruhig worde. Mir hei Wale gseh verbi zieh. Mit Fotoapparat bewaffnet si de aui Luet ( sogar d Crew u aui Guides hei mit woeue cho ) i di chline Booetli verfrachtet worde u mir si d Wale vo nachem ga luege. Es si Sperm Whales gsi. So um di 15 - 18 Meter laeng...u mir wuesse nid genau wie viel...eifach viiiiiiiiiel...mir wuesse nume, dass das sit 15 Jahr nie me eso uf de Galapagos isch vorcho...isch auso es mega Gfuehl...hockisch im ne chlini Booetli u rundum si aus riese Wale.

Am Nami isch schnorchle ufem Programm gstande...Bim Bade u Touche mit Schildchroet u Seeloeie hei mir auso fasch chli vergaesse, dass mir i daem Jahr ja gar ke Schoggioschterhaas choei aesse;-)
Puenktlech ufe Sunneungergang si de d Connae u i im warme Jucuzzi an Deck glaege u hei z blubbere u e feine Cocktail gnosse. Das isch es Laebe...:-)))

Nachem Znacht hets de no eis e feine Drink gaeh ( mir hei auso scho lang nuemm so viel Alkohol trunke...) u mir hei e Fotoshow vo uesne Inselusflueg choenne gniesse.

Z Tuepfli ufem I vo uesem Oschtersunnti hei mir de no i uesere Kabine gfunde...es Schoeggeli uf uesem Bett...

So cha me sechs auso la guet ga uf de Galapagos...u das aus last minute...

Zruegg z Guajaquil hei de d Connae u i no di letschti Zit gnosse. Naer hets de gheisse Abschied naeh...mir hei e cooli Zit zaeme gha!!! I freue mi auso scho uf di naechschte Aventuras wo mir hoffentlech zaeme waerde ha.

Bi de a daem Abe i Kino u ha ae riiiiise Tuete Fruschtpopcorn gaesse.

Wis de witer geit so allei ir grosse Waeut wirde i oeich de sicher schribe...

...hie nume afa e chliini Vorschou uf das wo de im naechschte Blogitrag chunnt...

...mis erschte Bier am Strand vo Mancora / Peru ...bi auso nach derae Flaesche fasch chli beduslet gsi...itz weiss i auso o, dass me o es chliners Bier haett choenne bstelle;-)

Auso...machets guet u bis zum naechschte mau

Connae u Caro

Kolumbien / Tayrona Nationalpark - luege u gniesse:-)

Hola!

Nach dr Ciudad Perdida hei mir afa eis chli Erholig u Zit zum Relaxe bruucht. Fuer das si mir de i Tayrona Nationalpark gfahre...es wunderschoens Flaeckli Aerde ar Karibikkueste vo Kolumbien...

U itz heit dir aui o grad chli Glueck! Dae Itrag wird naehmlech extrem relaxt...s git fasch nuet zum Laese nume zum Luege:-)...isch doch eis oeppis anders, oder...

auso gniesset di folgende Bildli doch chli mit ues mit...

...eifach troumhaft schoen...uebernachtet hei mir de uebrigens i Haengemattene ( scho ume ;-))

Auso, z naechscht mau ume de chli meh zum Laese...nume no soevu...es geit nis guet u mir si fit u zwaeg:-)

Adios u hasta luego

Itz wuesse mir o werum d Ciudad Perdida di verloreni Stadt heisst...

Hola!

Das Foto hei mir ueberigens nach dr Ciudad Perdida Tour gmacht...
...das heisst nach 6 Taeg ungerwaegs si, 25 Stung loufe, 18km i de Bei, baerguf u baergab, 8 mau duere Fluss loufe u no viu viu meh...
(itz wuesst dir o werum mir ender chli aut usgseh uf daem Bild;-))
Aber itz mau aus dr Reihe na...

Gstartet si mir am Morge frueh in Taganga. Mir hei de dert o z erscht mau uesi andere Reisegspaendli fuer di saechs Taeg troffe...drei Israeli, e Ami, e Kenyaner, e Suedafrikaner u uese Guia dr Daniel. Mir zwo si auso chli d "Huehner im Chorb" gsi.
Mit daem Outo si mir de zersch mau es Zitli ungerwaegs gsi, bis ues de bim Igang zum Sierra Nevada NP z Militaer unger d Lupe het gno. Di loeh de nid aui ine;-) Isch auso no es komisches Gfuehl gsi wie di Type mit irne Knarre ueses Outo hei durchsuecht.


U naer isches de los gange...Istimmig fuer di naechschte saechs Tage. 11 km Hardcorestrass...mir hei auso nid gloubt, dass me dert ueberhoupt no cha fahre. Es het gschuettlet u gholperet, isch nuemm vorwaerts gange u dr Abgrund isch maengisch so nach gsi, dass mir scho a au das daenkt hei was mir i uesem Laebe doch no eis haette woeue mache.
Bevor mir de z Fuess witer si hei mir no es Zmittag gaesse u dr Ian het sogar no Zit gha mit de Kiddis chli umedsbloedele. Guet...ds Lache isch ihm sowieso nie vergange...u das heisst de oeppis bi derae Tour.


Zum Glueck hei mir no es Eseli bi ues gha...de hei mir z Aesse nid emau muesse saeuber trage.


Wie scho gschribe si mir relativ viel gloffe u scho nach em erschte Megahoger isch a uesne Koerper gloub nuemm troche gsi...e Sauna isch auso e Schissdraeck drgaegae;-) Dr Schweiss isch ues nume so abegloffe wie chlini Baech. Mir hei auso scho chli glitte, schliesslech si mir ues sportlechi Hoechschtleischtige bi fasch vierzg Grad eifach nid gwanet ( u abgseh drvo isch Sport ir letschte Zit ja ender es Froemdwort gsi fuer ues beidi ). Glitte hei de uebrigens o aui andere...nume das mir das o grad choei klargsteue;-)


Aber mir si ja zaeii "Cheibe"...we me de naer cha obe abe luege de het sech di Mueh absolut glohnt!


Das isches itz auso..eis vo uesne Fuefstaernhotel...mit aextra bequeme Haengemattene inkl. Moskitonetz...suesch haette mir aeuae am Morge aube usgseh aus haette ues d Moskitos zum Znacht verspiise. Di chrazige Wolldechene hets de no gratis drzue gaeh.


Di Dechine hei de uebrigens nid emau viu gnuetzt. Ir Nacht isches auso fasch so chaut worde wies bi oeich daheime grad isch;-) (mir hei auso chli beduure mit oeich). Wo i de am Morge zur Connae ha ueberegluegt, ha i nume grad ihre Nasespitz gseh fueregluuesle. Ipackt u igliiret wie ds schoenschte Wiehnachtspaeckli isch si i ihrer Haengematte glaege. I ha naebedran aeuae nid viu besser usgseh aus sie.

D Ueberraschig am Morge isch de aube nid nume gsi, wie sech ueser igfrorene Chnoche afuehle sondern ono, oebs sech aech es chliis Tierli i uesne Schueh het ignischtet. Aute Pfadfindertipp...z ersch Schueh draeihe bevor me drischlueft.

D Tage hei immer chli glich usgseh...loufe, loufe u no eis loufe. Z Baegli uf u ds Bargli ume abe. D Landschaft isch aber extrem schoen gsi, mi het Zit zum studiere gha u zum umeluege u stuune u we eim nid no z Chnoei haetti weh ta, haett mes sogar chli choenne gniesse. I bi mir auso vorcho wie e auti Frou. Ghumplet ha i u am Schluss bi i sogar a zwenae Stoeck drhaer cho.

Zum Glueck hei mir maengisch ungerwaegs o choenne ga bade. I Naturalpools hei mir de ueser gschundene Koerper chli choenne ga entspanne...ha i emu gmeint. D Jungs si chli vom Felse abegumpet u wo sech de d Connae o vo drue Meter id Toeifi het gschtuerzt bi i de nuemm so relaxt gsi. Gruppezwang! I gibes ja zue...i ha mi nid trout u bi nume oeppe ab 1,5 Meter abegumpet. U wo mi de no e Fisch id Fuedlebacke het bisse isch de mit abefahre endgueltig fertig gsi. Die wo mi kenne choei sech vorstelle wie schnaeu i us daem Wasser bi dusse gsi.


A eim Tag si ues de ungerwaegs fasch Schwuemmhuet gwachse. Hei mir doch acht mau muesse dr Fluss duerquere. Mau us de stinkige Schueh use choh u di heisse Fuess vom viele loufe abzchuehle het de aber glich guet ta.

U itz no uesi Israelistory...
Mir heis auso scho vo Afang a chli daenkt...di Israelis si auso scho chli Tussis gsi. Z ersch hei si sech mit Farbe gschminkt u scho am dritte Tag hei di drei ihres Gepaeck scho nuemm saeuber treit. Sie hei lieber zahlt drfuer das dr Rucksack gschleppt wird! Nid grad maennlech!

Mi cha das auso fasch nid gloube we me ds naechschte Foeteli vo ihne aluegt. Si hei auso mega Froeid a aune Soldate gha ( u vo denae hets bau meh ume gha aus Boeim im Wald )...Mit jedem wo gruen agleit isch gsi hei si gredt u Froeid a de Gwehr, Handgranate u au daem Zueg gha. Si si ues auso fasch chli vorcho wie chlini Buebe wo oeppis guets zum Spiele hei uebercho...


Gaesse hei mir i denae saechs Taeg eigentlech immer guet. Bi daem Ablick isch eim aber dr Appetit zimli schnaeu vergange. Hei die doch mit dr Machete ufe Souchopf ighoue wie mir das aube im Winter bim "Naguspiel" mache. U z Tuepfli ufem "i" isch de no gsi, wo si z Hirni vor uesne Ouge roh hei ufgaesse. Anderi Laender, anderi Sitte! Mir wuensche e Guete!!!

Um grad chli bim Kulinarische z blibe...

Mhhhh...ds Militaer het gmetzget u mir hei gaesse...


...u am Morge ischs mir schlaecht gsi...um nid z schribe chotzuebel. Z ersch ds Chnoei u naer no ds Buuchweh...i bi fasch chli gspannt gsi was mir de no aus naechschts haett choenne weh tue. Dismau ha i auso muesse lide u mau nid Connae.


Ajajajajajajajajaj...het o zite gaeh wos mir chli besser isch gange. Are Liane duere Dschungel z schwinge ha i mir natuerlech nid la naeh.

Das isch es KOGI-Indianer-Dorf. Settigi Siedlige trifft me uf derae Tour es paare a. Di Luet laebe sit ewig ir Sierra Nevada u fuer ues geng no so wie im letschte Jahrhundert. Es si chli grimmigi Luet u hei nid so Froeid a deTurischte. Sie gloube naehmlech, dass mir d Waeut kaputt mache (sie hei gloub gar nid so unraecht ). Us daem Grund nenne si ues o di "chliine Bruedere".

A eim Tag hei mir de - top secret - oeppis ganz speziells doerfe miterlaebe...e Fuehrig im ne Drogelabor mit amne aechte Drogebaron! Z ersch hei si d Gaegend nach Militaer unger d Lupe gno u wo de d Luft isch rein gsi isches de los gange. Mit verbundene Ouge si mir zum ne Platz zmittst im Dschungel gfuehrt worde. Dert isch si de gsi - d Factory.

...u waer ues das aus itz wuerklech gloubt het isch saeuber tschuld. Ds Ganze isch naehmlech ender e Turischteuebig gsi. Es auts Manndli ( wo sech so chli oeppis drzue verdient ) zeigt eim im Wald wie me Kokain macht. Sini Factory besteit usemne chline Tisch u es paar Hilfsgegestaend...meh nid.
Aber ds Kokain - Rezaept kenne mir itz wuerklech u wes oepper vo oeich interessiert...kes Problem, nume ues frage. Uesi Antwort choschtet nid viu;-)


U nach au daem hei mir, scho fasch am Ziel acho, nume no 1700 Staegetritte muesse bewaeltige. Isch auso besser gsi aus jedes Chrafttraining.


U naer si mir acho u hei se gfunge...ds Ciudad Perdida.

A daem Tag hei mir nueme viu meh gmacht aus aesse u am sibni si mir aui scho ga schlafe. Am Morge het ues de dr Daniel Empanadas gmacht u mir si aui ume fit u zwaeg gsi di verloreni Stadt o ga azluege...mit Begleitig! Drei Soldate hei ues di ganzi Zit begleitet...schiins zu uesere Sicherheit. Irgendwo i derae Sierra Nevanda isch haut d Guerilla immer no ume. D Connae u ig hei de naebscht dr Gschicht zur Ciudad Perdida ono grad e gratis Spanischkurs gha. Ja, mi redt ja scho mau mit de Iheimische we me scho mau d Glaegeheit drzue het.

Mir heis de o nid choenne la si u hei mit de Soldate ono es Turischtefoto woeue mache. Z Gwehr hei mir de aber dankend abglehnt...ploetzlech hets irgendwo i de Baerge klepft...di zwe Soldate hei sech sofort i Schussposition gschtuerzt...u mir zwo si eifach chli ratlos blibe stah...di perfekte Zielschibene. Das Ganze isch aber gar nuet bsundrigs gsi...passiert hie jedae Tag...aber wie choei mir das o wuesse.

Das isch es auso gsi...itz wuesst dir o werum d Ciudad Perdida di verloreni Stadt heisst.

U steuet oeich vor...dr glich Waeg isches de o ume zruegg uf Taganga gange...aber das loeh mir itz...dir choeitnechs ja oeppe saeuber vorsteue...

... nume no eis...z Bier nach denae saechs Taeg hei mir i volle Zueg gnosse u isch so guet gsi wie no nie vorhaer!

Bis gli!