4 Wuche Macholand / Mexico

Hola!

Ja...dir heit ja afa eis Spruechli vo de Mexmanne...sorry Mexmachos ghoert. Mi muess sech auso scho grad chli a di neue Luet u o a di hoeche Priise gwane ( mis Konto wird hie auso zimli strapaziert...muess de oeppe no fruecher hei cho aus planet;-)).

Ds Gabi u i hei de di letschte gmeinsame Taeg in Playa del Carmen verbracht. Wo mir bim Achoh de di viele Turis hei gseh, waere mir am liebschte grad ume zruegg uf Belize. Da aber ds Gabi vo dert isch hei gfloge hets gheisse...ushalte u duerehaute!
Ha de am Morge frueh ds Gabi verabschiedet u ha de afa grad eis ine billerigi Unterkunft gwaechslet. Very basic...wuerd me gloub zu derae saege... S isch di erschti Unterkunft wos ueberhoupt in Playa het gaeh...u nume so naebebi erwaehnt...si isch sit denn aeuae o nie meh renoviert worde. Isch aber no luschtig gsi...s het de dert ono Haengematteplaetz z vermiete gaeh...di si aui a Iheimischi wo in Playa buegle vermietet gsi...duere Tag het me se am Schmuckstand oder aus Strandmusiker gseh u am Abe si si fuul ir Haengematte umeghanget. Dr eint Musiker laebt auso scho sit sage und schreibe saechs Jahr i sire Haengematte.

Si eigentlech silbregi Stoeggelischueh im Momaent grad "in"? Im Baelliz vo Playa isch me auso nume oepper we me i settige Schuelis umestolziert...aber ke Angscht, ha mr no kener kouft... mir isches, i de mittlerwile fasch agwachsene Flip Flops, geng no wohl;-)

Di naechschti Station isch de Merida gsi...d Stadt vo de Haengemattene. Dert ha i de es cools Hostel gfunge...am Abe hetts sogar Salsalessons gaeh, u i ha ume eis chli mis Fuedli choenne schwinge...dimau aber nid mit amne Schwed sondern mit amne Oustralier...

Dert ha i de d Corinne ume troffe...lehre kenne ha se im Januar in Costa Rica...Zuefaell gits!

Merida waer zwar e schoeni...aber leider extrem heissi Stadt. Zwuesche 42 u 45 Grad muess me moege ushalte we me dert isch. I ha auso aube fasch z Gfuehl gha miner Flip Flops blibi am Bode chlaebe. Eini vo mine noeiie Lieblingsbeschaeftigunge isch de auso worde, usezfinde wo dass es ueberall Klimaalage het gaeh...ohni die wuerd me gloub in Merida nid ueberlaebe.

I ha de no eis e Usflug zure Cenote gmacht...das si ungerirdischi Seeli mit, nume so naebebii erwaehnt, richtig gruusige Fische drinne.

Im Nachtbus uf Palenque ha i de d Bettina u d Christine lehre kenne. Di zwoei choeme vo Steffisburg. Mir si de grad es paar Taeg zaeme ungerwaegs gsi...u es het auso mega gfaegt!

In Palenque hei mir de es Cabanas zmittst im Dschungel gha...u uesi Nachbarin hei mir de sogar no kennt...d Corinne! Mir heis de in Palenque nume ei Tag usghalte...isch eifach viu z heiss u z schwuehl gsi!

Vor Mayaruine wo mir si ga aluege doerft dir es paar Bildli aluege...u steuet nech bim Luege eifach vor es waer oeppe 40 Grad heiss u oeppe so fuecht wie ire Sauna...

... i weiss nid waer hie am gwundrigschte isch gsi...di vier oder di Horde Affe ufem Boum obe...


Nach derae Hitz, schwitze u nume haublaebig umehange si mir de uf San Cristobal. Chum gseht me es Bitlzli vo derae Stadt het me se scho grad gaern. Mi het eis nuemm heiss, es sich agnaehm u es het e mega schoene Maerit zum ichoufe ( u da i ja no Bsuech vo mine Eltere ueberchume, cha i bim Shoppe so richtig zueschlah:-))i muess es ja de nid mit hei schleppe...

Mir si de no ds Medizinmuseum vo de Mayas...so ueberchoeme uebrigens d Mayas ihri Ching...

...hei e Usflug zum Canion del sumidero gmacht...inkl. Krokodil feinem Zmittag;-)

...u si ds Mayadoerfli San Juan Chamula ga bsueche.

Dert gits auso e ganz e bsundregi Chiuche. D Luet hoeckle am Bode uf Tannenadle, zuende Cherze a, baete i eire Lutsterchi, striche mit laebige Huehner u Eier ueber Babys (u draeihe naer de Huehner dr Gring um!), trinke Cola u gorpse naer lut use...isch auso scho chli komisch we me das gseht...

I bi mir ja itz scho viu gwanet...aber di 18 Stung im Bus vo San Cristobal uf Cancun si auso zimli muehsam gsi. Ha zwar e redseelige Mexikaer naebe mir gha...aber o we i au Stund Sitzposition gwaechselt ha, hett mir mis Fuedle am Schluss auso zimli weh ta.

Bi de no grad witer u mit dr Faehre uf d Isla Mujeres gfahre. 4 Taeg chli sii, nuet mache, baedele, u mi vorbereite uf zwe Wuche Ferie mit mine Eltere;-))...meh ha i auso nid gmacht.

Bevor i de miner Eltere bi a Flughafe ga abhole ha i no fuer nes Hotel fuer di erschti Nacht gluegt. Hey, wo i das Zimmer ha gseh ha i fasch gmeint i sig im fautsche Film. Zwoei riise Bett, e Fernseh!, aus isch suuber gsi, Tuechli u sogar no es Pool...u z Beschtae isch no gsi...s het mr so e Machomex muesse d Taesche d Staege ufetraege:-)))

2 Wuche mit de Eltere chruez u quer duer Mexico ungerwaegs...

Agfange hei mir in Cancun...blibe si mir nume grad ei Nacht. Naer isches witer uf Paamul...es chlises Stueck Paradies diraekt am Meer...schliesslech het z Mami ja o Geburtstag gha.

Das isch uebrigens d Ussicht vo uesem Bungalow us...

Z Akumal si mir de z erscht mau ga schnorchle...u sogar miner padres hei choenne mit Flosse, Toucherbruelle u Schnorchel hantiere;-))

Dr Jetlag het bi denae zwoeine auso o es paar Taeg Uswuerkige zeigt...mued scho am Nami u am Morge frueh topfit...

In Tulum hei mir de z beschte Hostel ( lut dreine Australier wo i in Merida troffe ha ) usprobiert. U es isch mega gsi...superfruendlech u es Hammerzmorge...we auso oepper vo oeich ir naechschte Zit in Tulum isch...maeudet nech...isch wuerklech e Gheimtipp!

O dert hets natuerlech Mayaruinene gae ( vo denae gits auso extrem viu )...u die si mir natuerlech o ga aluege. Si si mega schoen glaege...direkt am Meer...

...de cha me nach em "astraengende" Teil ono grad ids Meer huepfe...

Naer hets de agfange...Raege, Raege u no eis Raege. I ha bim Outofahre auso dr Schibewuescher eis so fescht igstellt gha, dassne grad het abgspickt:-)Dr Raege het sech de i nes mega Gwitter verwandlet u am Schluss isch sogar e richtige Sturm drus worde. Si hei auso sogar oeppis ir Zitig drueber gschribe. Kes Wunder, es het blitzet wie wild u es isch zmittst ir Nacht maengisch taghell gsi...gfuerchig. Di zwoei naechschte Bilder si, dass me sech das o wuerklech chli cha vorstelle...

...Wasserfall zum Erschte...

...u dr glich Wasserfall zum Zwoeite...

A mim Geburi si mir de no eis in San Cristobal glandet...mir gfallt di Stadt eifach so guet.

Uxmal...no eis e andere Steihuuefe, Campeche u Merida si de ueser naechschte Stationen gsi.

...bim Haengemattechouf in Merida...mi darf auso sogar probeliege...u dank em Verchoeifer wuesse mir its o, dass me sogar "gutschi gutschi" ire Haengematte cha mache;-)

...z Buech Hamaca - Sutra;-) ueberchunnt me de no gratis drzue...

Chichen Itza, natuerlech o ume so e Steihuufe, isch de di letschte Mayaruine gsi wo mir si ga aluege...aber o die isches Waert we me se geit ga bsueche...

Uf dr Isla Cozumel si mir de no chli ga relaxe. Paepu u ig si de no eis ga schnorchle...u mir hei auso ume e chliine Schildchrot gseh...isch eifach mega.

Dr allerletscht Tag hei mir de no uf dr Isla Mujeres verbracht...Bevor di zwoei a Flughafe hei muesse si mir no chli ga Sii, ga baedele u ga nuet mache...u natuerlech ono z letscht mau z troumhafte "blau" vom Meer ga gniesse...

...u itz si si scho ume daheim...so schnaell geit das! S het gfaegt mit oeich i de Ferie...merci viu mau fuer aus!!!

Zum Schluss...

Sorry Paepeli...aber dae Schnappschuss muess i eifach ono i Blog tue...man beachte...privates Grundstueck!!!

Itz bi i fuer di letschte drei Wuche no eis allei ungerwaegs. Cancun - Chetumal u ab duer Belize uf Guatemala. Dert wott i miner letschte Tage pura vida no gniesse...

...vo dert gits de ono eis News!

Haebets guet, gniesset d EM u fiiret chli fuer mi mit:-) ab u zue cha sogar i es Spiel luege:-)

Hasta luego

Caro

We are sailing again...from Caye Caulker to Placencia / Belize

Mit Raggamuffin Tours ungerwaegs...Saegelturn vo Caye Caulker uf Placencia

Mit an Bord...

Hollaender, Franzose, Duetschi, Australier, Italiener, Spanier, Englaender, Kanadadier, Amerikaner, mir zwo u di drei vor Crew...e gueti Mischig!

Das isch Jimmy, uese Kapitaen...normalerwiis het aer aube es Tuech ume Chopf gliiret gha u het usgseh wie ae richtige Pirat...guet, so cool wie dr Jonny Depp in Pirates of the Carribbean het aer scho nid usgseh...aber bim Rum trinke wuerd aer aeuae sogar dr Captain Jack Sparrow ungere Tisch suufe;-)

...u das isch ueses Schiff gsi...d Ragga Queen!

Chli sii, suennele, aesse, schnorchle, fische, schlafe, lafere, feschte...das si oeppe so di wichtigschte Sache wo mir waehrend denae drei Taeg hei gmacht. U oeppis isch eifach dr Hammer gsi...di ganzi Zit hei mir Meer i derae Farb um ues gha...

Jedae Tag hei mir es paar mau im/um/am Barrier Reef ( am zwoeitgroeschte Riff vor Waeut ) doerfe ga schnorchle.

Es isch ungloublech gsi was mir aus hei gseh. Choeit nech auso eifach e Farb usesueche u es het ganz sicher irgendwo es Fischli oder e Koralle i derae Farb gha. Mi het de Roche choenne zueluege wie si duer z Wasser saegle u o we dir aui mir itz das sicher nid gloubet...i ha sogar einisch mit are Horde Haie gschnorchlet! Ha de sogar es Foeteli aus Bewiis gmacht:-)

I ha de nachem schnorchle aube gnue Fisch um mi gha u ha z fische de andere ueberlah.

Das isch uebrigens am erschte Abe ueses Znacht gsi...s het Barracuda ala Ramsey ( uese Schiffschoch ) gaeh.

Das isch ueses "Huus" fuer di erschti Nacht gsi. We me guet luegt gseht me ufem zwoeite Foto ueser Zaeut. "Jedae bruucht si Insle;-)"...i ha gloub mini gfunde...

Mir heis de a daem Abe wie eigentlech geng zimli luschtig gha...u je spaeter s sich worde desto meh het me d Uswuerkige vom "Rumpunch" gmerkt...

Di zwoeiti Nacht hei mir de uf Tobacco Caye verbracht. We auso oepper vo oeich e Tipp fuer d Hochzitsreis bruucht...das waer ne auso itz...

Mir hei de a daem Abe no grad eis es Fescht gha...u i ha ume eis uf ne Trummele choenne schlah. Has de naer de richtige Profis ueberlah...u mir hei sponti es Garifuna Konzert doerfe gniesse.

Das isch de am dritte Tag, bevor mir de in Placencia si acho, uese letscht Schwuemm - u Schnorchelstopp gsi. S het no eis gheisse das Paradies i volle Zueg gniesse. U viu meh muess i zu denae Bilder gloub o gar nuemm schribe...di spraeche eifach fuer sich...

Das isches ume eis gsi...nach drei Taeg si mir guet in Placencia acho u wie dir gseht geits ues auso tip top...u i hoffe oeich aune o!

Ds naechscht mau maeude i mi de us Mexico...u hie nume afa e chliine Vorgschmack...

Di Machomanne z Mexico roube auso sogar mir fasch dr letscht Naerv...we me so Spruech wie

" mexican boyfriend to rent "ghoert, chunnt eim doch fasch z Zmorge ume obsi, oder...

Auso, haebets guet...hasta luego...Caro

...Gabi was meinsch zu daem Blogitrag? Bisch zfride oder ha i oeppis wichtigs vergaesse;-)