Hola...oder viellech besser gseit...tschou zaeme!!!

Hola!

Gli isches auso sowit...mis haube Jahr geit langsam am Aendi entgaege u i chume scho gli hei i di gueti auti Heimat.

I freue mi auso

uf oeich aui!!!

I ha i denae saechs Moenet viu verschiedeni Laender u Orte gseh...aber we i ganz ehrlech bi ...so e schoene Ort wie Thun ( inkl. sine Luet ) gits niene suesch uf dr ganze Waeut!

I ha extrem viu erlaebt i derae Zit u dir waerdet aeuae de nid verschont eis oder zwoei Gschichtli vo mir muesse azlose. Es si naemlech genau...184 Taeg pura vida...gsi!
I ha...

...17 Buecher glaese ( guet chume i hei, suesch wuerd i mi gloub no zur Bibliothekarin la umschuele;-))

...i ha i 89 verschiedene Bett gschlafe ( das toent o ;-))...u itz froeie i mi uf mis!

...6 T - Shirts verbruucht...ds Schwarz isch itz grau ud Loecher ha i auso no nie aui zehlt...

...10 Naecht im ne Bus verbracht...

...vo 8 Laende e noeie Staempu i mim Pass...

...u aui andere Sache erfahret dir de sicher eis bim ne Bierli...

So, das isches gsi...bis gliii...

Muntsch Caro

Guatemala

Hola!


I bis auso no eis...zum vorletschte mau. S git de no e auerletschte Blogitrag.


I bi itz auso di letschte drei Wuche no eis "allei" ungerwaegs. Mini letschti Zit vo 184 Taeg pura vida verbringe i no in Guatemala!



Flores

In Flores ha i de nume e churze Zwueschestopp gmacht. Nach zwe Taeg meh oder weniger im Bus hocke ha i eis e Pouse bruucht. Flores isch guet zum chli Sii (mi duenkt i machi nuem anders aus das;-))...uf dr Dachterasse ir Haengematte fuul umeliege, laese, im See ga baedele...u EM - match luege. I ha de auso z Spiel Holland - Frankrich 'live" miterlaebt. E ganzi Horde Luet ( sogar settigi i orange T - Shirt ) si vorem Fernseh klaebt u hei mitgfieberet. Mir hei scho es Fescht gha...u oeies daheim cha i mir nume vorstelle!


Vo Flores uf Antigua bi i de mit em Nachtbus...


Antigua


...di typische Busse vo Guatemala...isch auso o una aventura we me mit denae fahrt...nid ganz ungfaehrlech. I daenke mir aber geng, dass dr Fahrer ja hoffentlech ono es Zitli wett witerlaebe...





I di Stadt ha i mi auso innert Sekunde verliebt. Isch eifach mega hie...haerzigi Gasse, e Huufe Chiuchene zum aluege, ueberall uf dr Strass wird Zueg verchouft...we me eis nuem ma umeloufe hangisch chli i eim vo de viele Paerkli ume oder gniessisch irgendwo e feine Fruchtsaft. Irgendwie het di Stadt e Charme wo me sech fasch nid cha entzieh...we i auso no chli meh Zit haetti, miech i gloub hie no e Spanischkurs...aber i muess auso saege...i ha i denae saechs Moenet nie Zit gfunge ine Schuel inezhocke...;-)

...mis "Daheim"...fuer saechs Franke!



Volcan Pancaja


Ds Guatemala gits jedi Maengi Vulkaen u mi cha hie sogar uf ne no aktive Vulkan ufeloufe. I guet 1 1\2 Stund isch me de dobe ( u i ha mi nach dreae Tour auso oeppe so mued gfuehlt wie nach em eiwuechige Gigathlon...wird gloub Zit das i hei chume;-)).


Naer wirds heiss...mi louft naemlech ueber auti Lava u drunger fliesst di noeii. Us de Spaelt rouchnets de u es chunnt e mega Hitz use. Mi cha de sogar e fliessende Lavastrom ga luege.


Mir hei de Marshmellows braetlet...stimme mi afa chli uf daheime i...wieder eis ae feini grilleti Cervelats...mhhhhhhhh!




Isch auso idruecklech...mi het aber scho chli es komisches Gfuehl...ke Ahnig we dae znaechscht mau usbricht...


Cerro de la cruz


Hie ufe muess me auso mit dr Turischtepolizei...wenn nid, faehlt eim sicher oeppis we me ume obe abe chunnt. Vo dobe het me de e wunderschoene Usblick uf Antigua.


Aber dir gloubet nid wieviel Energie mi das bruucht het bis i de aendlech dert bi glandet. Di hei hie, ke Ahnig wieviel verschiedeni Turischtepolizeie...u bi jedere wo i, mit mim mittlerwile gar nuem so schlaechte Spanisch, gfragt ha, hei si vo derae Tour gar nuet woeue wuesse. Mit chli Geduld um ne naette Laechle ueberchunnt me hie aber fasch aus...

San Pedro, Lago Atitlan

Di Busfahrt isch nid so lang gange...zum Glueck...ha langsam gnue vom Busfahre. Froeie mi uf mis Velo daheim!

Uf San Pedro chunnt me de mit amne chliine Boetli...u es waer eigenlech nid so e schlimmi Fahrt...wes nid grad wuerd schiffe, blitze u donnere! Wie isch das noeime gsi...z Wasser zieht doch Blitze a, oder?


I ha de beschlosse vier Naecht, i daem wuerklech haerzige Doerfli, z blibe. I ha mir de es richtigs Luxushotel gleischtet. I ha e Terasse gha...mit Blick ufe See, e Haengematte nume fuer mi allei, es Bad u e mega heissi Duschi u vo mim Bett us ha i duer nes riise Faenschter ufe Lago gseh...wuerd meine...pura vida!!!



Gseht doch us wie dr Thunersee u dr Niesen, oder?




Volcan San Pedro



Has im Momaent grad chli mit de Vulkaen...vo denae gits hie o gnue. Dismau isches e erloschene Vulkan gsi wo i ufegloffe bi. Ha doch scho letscht mau gschribe es sig astraengend gsi...da ha i auso no nuet vom Volcan San Pedro gwuesst. I bi gloub chli wahnsinnig gsi wo i di Tour buechet ha. I meine gloub immer no i sig oeppe so fit wie vorem Gigathlon, oder so.

...d Ussicht vo haub obe...

4 1/2 Sung wuerklech steil ufe loufe, 1500 Hoehemeter... duer Matsch, ueber Steine, Staeggetritte, duer Maisfaeuder, Kafiplantagene...ke Ahnig wie i das gschafft ha. Obsi bi i ja e mega Flaesche...dobe bi i gloub nume glandet woeu i so e stuure Gring ha...emu nid waegae mine No-chli-Muskle i mine Oberschaenku. Dobe isches de aber e Troum gsi...

...d Ussicht vo ganz obe...

Abe isches de chli ringer gange...aber nume e chli.

Zruegg im Hotel bi i grad oeppe ei Stung i mire Haengematte glaege u ha nuet gmacht...ersch naer ha i mi choenne ufraffe um di heissi Duschi ga z gniesse.

Mis Fazi nach daem Tag...isch schoen gsi...aber bitte "never again"...emu fuer di naechschte paar Taeg;-)

Maerit in Chichigastenango

Ha daenkt i machi gschider ume eis oeppis chli weniger astraengends...guet, oebs das wuerklech so isch gsi sei dahingestellt! Mhhhhh...ei Maeritstand am angere...soooo schoen. Bi no eis chli ga Shoppe. Guet, Platz ha i mim Rucksack auso scho lang kene meh.

Sgseht auso scho chli anders us aus bi ues daheim...

Puerto Escondido / Mexico

Di wuerklech allerletschte Taeg vo mine Ferie bi i itz no in Puerto Escondido. E chline Surferort ar Pazifikkueschte vo Mexico.

Ha daenkt i woeui no eis probiere uf nes Surfbrett z stah. Wo i de aber di Waelle!!! ha gseh, ha i mi de doch entschiede lieber no chli a mire Brueni z schaffe...



Di Type...ha bis itz auso no ke Frou gseh wo sech da id Fluete stuertzt...surfe sogar duer dae beruehmt Tunnel wos aube git...ungloublech!
Scho nume we me ids Wasser wott ga baedele muess me ufpasse das eim d Stroehmig nid grad mitrisst. Geschter hets sogar e Unfall gaeh...di suesch si lahme Mexe choei auso, wes muess si, sogar pressiere...


Ha mir hie e chlini Wohnig gmietet ( 12 Franke im Tag!!! ) u versueche mi so chli ads Laebe daheim z wane. Choche saeuber!, wische ab, putze,...


...geit ja nuemm lang!


Auso...haebets guet u bis gli daheim!!!

Muntsch Caro


...ha de uebrigens o gseh wie d Hollaender verlore hei...:-(