Monteverde 13.1. bis Golfito 27.1.

Hola!

Was weiter geschah...wes nech wunger nimmt ( Monteverde - Golfito )

Mir hei itz de scho gli jedi Strass ( mi seit im emu so ) in Costa Rica ( inklusiv Loecher u hoechscht Punkt vor Panamericana ) einisch oder o mehrmaus ( mir verfahre ues oeppe die eis...isch aber de nid uesi Schuld...d Ticos findes drum nid so wichtig ihri Strasse u Chruezige azschribe) gfahre. Dass dir o eis e chlini Iblick heit vo was fuer Strasse i da aube so redae...hie ae chlini Choschtprob...

Einisch haett i sogar fasch e Leguan ubercharret...zum Glueck het ueses BIBI so gueti Braemse...das wuesse mir itz auso o!

Nach uesem muetige Tarzansprung z Monteverde si mir auso witer zum Nationalpark Rincon de la Vieja gfahre...

I saege nume...

...750 000 Muggestiche ( u mindeschtens d Haeufti bisst wie ne S... )

...1 mau abem Ross gheit ( auso z Ross isch ender umgheit aus i...u i laebe auso no )

...1 mau Hose flicke ( verschrisse isch ja gloub nuemm so in )

...1 mau ae Zaegg

Vo mir gits aebe kes Foto...bi ja abegheit ab daem Goul u da ha i das Viech nid woeue i mim Blog verewige;-) Drfuer doerft dir ds Sqwa Marianne chli beguetachte...

I daem Nationalpark hets aber ono es paar erfroeilicheri Sache gae... e aktive Vulkan, blubberndi Schlammloecher, Fumarole, nach Schwefel stinkendi Dampfwulche, Thermalquelle,...

Trotzdaem isches gloub glich besser gsi si mir de gli witer gfahre... suesch waer i huet aeue nuemm ir Lag e Blogitrag z mache!!!Waer weiss was suesch no aus waer passiert;-)

Nach tuusig Tier ( vorauem e Huufe Voegu, Ornithologin wirde i auso nuemm ), Baerge, Boeim,...isch mau Strand u chli Sii ar Reihe gsi.
Mir si, fuer einisch zimli ohmi Umwaeg, diraekt uf Samara gfahre. Isch de aber glich scho dunku gsi wo mir si acho.

U itz, laeset eis u tuet naer d Ouge zue u steuet nech dae Platz mau vor:

Es Cabina diraekt am schneewiise Strand, es Lueftli wo geng geit, d Waelle wo im Hintergrund ruusche u dir loeht nech ganz fiin ir Haengematte la hin u haer plampe. I de Haend heit dr es guets Buech u dr ganz Tag Zit a daem wunderschoene Ort chli ds Sii. Ab und zue waelzt me sech ids badwannewarme Wasser u geit ga plantsche um sech naer im warme Sand unger de Palme la z troechne. We me Luscht het cha am moenschelaaer Strand ga spaziere u Muschle sammle oder mi geit ids Strandbeizli u bstellt bim ne dueretrainierte Surftico e fruesch gmachte Fruchtdrink ...

...mi choennt auso fasch saege mir hei es Stueckli Paradies gfunge...

Es zwoeits Paradies hei mir de in Montezuma gfunge...eigentlech choeit dir dr Abschnitt vo obe no grad eis laese...s git nume oeppis zum Ergaenze...z Montezuma hei mir ueser Haengematte mit spielende Affe muesse teile;-)

Vor Haubinsel Nicoja si mir de per Faehre ( dismau hei mir se knapp verwuetscht ;-)) zruegg uf ds Feschtland uf Quepos.

Ungerwaegs si mir de no "hurti" ueberne Pass gfahre...em Cerro de la muerte ( 3491 Meter )u bi uesere Wanderig hei mir beid zimli muesse schnuufe. Erschtens si mir ues bewege grad nuemm so gwanet u ersch raecht nid ire settige Hoechi. Ir Nacht isches auso fasch 0 Grad gsi...u mir hei ume eis au uesi warme Sache bruucht ( das soeu itz die au troeschte wo chli niidisch si, dass mir suesch geng choei i Flip Flops umeloufe;-)).

Ufem Cerro de la Muerte...

Ei Tag hei mir no im Nationalpark Manuel Antonio verbracht...vo dert choeit dir eifach es Bildli luege...

Quepos - Golfito haett de ume eis e laengwilige Fahrtag soeue waerde... isch nuet gsi.
Ganz spontan si mir a daem Tag no "hurti" e Bootstour zum Wale beobachte ga mache. Mir hei de o z riise Glueck gha u e ganzi Horde short-finned pilot Wale gseh. Mir hei se gseh springe u ghoere singe. Wahnsinn!Ha sogar fasch chli vergaesse mi Fotoapparat fuere z naeh...

Isch ender chli schwierig gsi di Wale z foetele...si si immer genau dert uftoucht wo me se eigentlech gar nid erwartet haett...

Bire Tankstell hei mir de no ganz spontan ds BIBI hurti chli putzt...i gloube sone Draeckcharre haette die suesch sicher nie meh zruegggno...

Guet...mir haette no e anderi Mueglechkeit gha ueses Outo z waesche...aber da hei mir doch fasch lieber saeuber dr Draeck fuert gschruppet...eifach haut nid oben ohne;-)))

Ja, gli geit d BIBI Aehra am Aendi entgaege...fertig mit Luxusturischterle. I ha drum de oscho mis erschte Paeckli id Schwiz gschickt ( Ueberfluessigs ipackts - mi isch bim Reise immer mit wie weniger z fride u ja i gibes ja zue...das wo i scho g shoppet ha )...Muess ja scho gli mi Rucksack saeuber umetrage...

Auso...mis Ticket fuere Bus zruegg uf San Jose ha i huett grad kouft ( Abfahrt, 5.00 Uhr...am Morge!!).Ga d Connae ga abhole...

Hey, das waers ume eis gsi...

S gieb ja no viu meh z schribe aber i gloube dir heit ja ono anders z tue aus mini Gschichtli z laese...

Hasta luego bis zum naechschte mau:-) Caro