Volcán Poás - Manzanillo - Tortuguero

Hola!

Drue chlini Gschichtli u es paar Foeteli ( mit chli Hilf ha igs auso gschafft;-))vo de erschtae paar Taeg... Artho, merci dir no eis viumau fuer ds Haeufe bim Eroeffne vo mim Blog!!

...grad scho mau vorhaer...es geit ues guet u mir si fit u zwaeg ( ussert das mir am Abe so ab de sibne zimli fuul si u scho am achti problemlos choennte ga pfuuse...gloub das nennt me Jetlag;-)

...guet, mittlerwile duuret dae Jetlag scho oeppe vierzaeh Taeg;-)gloub das isch ender akuti Urloubsmuedigkeit...

Volcán Poás...5.1.08

Steine, Loecher, Draeck, stotzig...zum Glueck hei mir es 4WD - Outo gmietet. Dr Waeg zur Lodge Lagunillas isch ae "chlini" Useforderig gsi! Ueser Fahrkuenscht,bi nid ganz optimale Bedingige,si emu de grad teschtet worde;-)...

(...steuet nech vor...di auti Adubodnerstrass unteerert u imne nid ganz guete Zuestand...)

S het de klappet u mir hei di wahnsinns Ussicht u drzue no e mega Sunneuntergang choenne gniesse.

Waer itz daenkt mir sigi hie am Schwitze tuescht sech aber...nume so bilaeufig...i ha im Thermoshirt mit dr Kapuze dobe gschlafe u geng no chaut gha...

Znacht hets de Fisch gaeh... u de ersch no ae saeuber gfangene...emu fasch.

Us luter Bloedi ha i dae Hagge eis ids Wasser gha u ha nie im Laebe dra daenkt es choennti e Fisch abisse...fautsch danekt...ar Angle ha i di Trucha ( Forelle ) leider no schnaeu eis gha...aber das mit em usezieh, Haage usenaeh u am Fisch eis ueber Gring houe isch de chli schwieriger gsi...

...gibes ja zue...d Marianne het dr Fisch usezoge u dr señor vor Lodge het de dr Raescht gmacht;-)

Gaesse ha i dr Fisch de aber saeuber!

Am Morge...nach dr Duere - schuettel - Strass si mir de dr Volcán Poás ga aluege...mir hei auso mega Glueck gha...fuef Minute freii Sicht ufe Krater u naer isch scho duere gsi u d Wolke si drinn ghanget...

Manzanilla...8.1.08

Manzanilla...es chlises Fischeroertli ar Karibikkueste. Chli sii, abhaenge ( Gabi...s gseht oeppe so us wi Vang Vieng oder Pai :-) )u eis rouke waer hie genau z Richtige.

Chli Gsii si mir o...mir hei de aber no e Dschungeltour gmacht...

Fuultier, Affe, Froesche, Schlange, Krabbe, Schildchroet, Suesswasserkroki,...mit chli Zit umne guete Guide gseht me hie au di Tier. Fuef Stung si mir mit em Omar ( e vom rouke chli dueregheite Guide )chruez u quer duere Dschungel gloffe.

Suechbild...

Choeit auso oeii drei Joker bruuche zum usefinde was me fuer nes Tier gsaech;-)

Tortuguero...10.1.08

Tortuguero...e Lagune im Norde vor Karibikkueste wo me nume mit em Boot erreicht. Isch ja eigentlech kes Problem...s git ja mehrmals taeglech Turibooetli wo eim i oeppe 45 Minute uf Tortuguero bringe...

...we me ds letschte nid wuerd verpasse! Mir si grad "echli" spaet dranne gsi...s het haut eifach grad nid glaengt.

Ticos...so wie me hie de Costaricaner seit...si aber zum Glueck sehr hilfsbereit gsi u mir hei mit amne Transportbooetli doerfe mitrite...Schwein gha...zwuesche Mineral, Cola, Fruecht, Chips,...hei mir auso de di Fahrt glich no choenne gniesse.

Sie si sogar so hilfsbereit gsi, dass eine mi extrem schwaer Rucksack ( i bi auso scho am Balascht abwaerfe u mi nume no uf di wuerklech wichtige Sache z beschraenke ) sogar id Unterkunft treit het...

Am Morge isch ues de ae Guide ( dismau ae niddueregheite ) am saechsi cho abhole u mir si zwo Stung duer d Kanael vo Tortuguero paddlet...Affe zum Griffe nach, Kaimane grad naebem Boot, Spinnele i Riichwiti,...i wott nech doch chli gluschtig mache...

So, miner erschte drue Gschichtli u es paar Foeteli...so het ds Ganze agfange u geit jedae Tag witer...gli gits meh...fuer diae wo wei...

haebets aui guet...hasta luego Caro

...dr Bitrag gseht nid ganz so us wie igs gaern haett gha...aber...mit mini extrem - nid - guete Compikenntnis isch das auso z Beschtae wo i ha choenne mache...